תהילים סז

לַמְנַצֵּחַ בִּנְגִינֹת מִזְמוֹר שִֽׁיר׃

אֱֽלֹהִים יְחׇנֵּנוּ וִיבָרְכֵנוּ יָאֵֽר־פָּנָיו אִתָּנוּ סֶֽלָה׃

לָדַעַת בָּאָרֶץ דַּרְכֶּךָ בְּכׇל־גּוֹיִם יְשׁוּעָתֶֽךָ׃

יוֹדוּךָ עַמִּיםאֱלֹהִים יוֹדוּךָ עַמִּים כֻּלָּֽם׃

יִשְׂמְחוּ וִירַנְּנוּ לְאֻמִּים כִּֽי־תִשְׁפֹּט עַמִּים מִישֹׁר וּלְאֻמִּים בָּאָרֶץ תַּנְחֵם סֶֽלָה׃

יוֹדוּךָ עַמִּיםאֱלֹהִים יוֹדוּךָ עַמִּים כֻּלָּֽם׃

אֶרֶץ נָתְנָה יְבוּלָהּ יְבָרְכֵנוּ אֱלֹהִים אֱלֹהֵֽינוּ׃

יְבָרְכֵנוּ אֱלֹהִים וְיִֽירְאוּ אוֹתוֹ כׇּל־אַפְסֵי־אָֽרֶץ׃