א
לַמְנַצֵּחַ בִּנְגִינֹת מִזְמוֹר שִֽׁיר׃
ב
אֱֽלֹהִים יְחׇנֵּנוּ וִיבָרְכֵנוּ יָאֵֽר־פָּנָיו אִתָּנוּ סֶֽלָה׃
ג
לָדַעַת בָּאָרֶץ דַּרְכֶּךָ בְּכׇל־גּוֹיִם יְשׁוּעָתֶֽךָ׃
ד
יוֹדוּךָ עַמִּיםאֱלֹהִים יוֹדוּךָ עַמִּים כֻּלָּֽם׃
ה
יִשְׂמְחוּ וִירַנְּנוּ לְאֻמִּים כִּֽי־תִשְׁפֹּט עַמִּים מִישֹׁר וּלְאֻמִּים בָּאָרֶץ תַּנְחֵם סֶֽלָה׃
ו
יוֹדוּךָ עַמִּיםאֱלֹהִים יוֹדוּךָ עַמִּים כֻּלָּֽם׃
ז
אֶרֶץ נָתְנָה יְבוּלָהּ יְבָרְכֵנוּ אֱלֹהִים אֱלֹהֵֽינוּ׃
ח
יְבָרְכֵנוּ אֱלֹהִים וְיִֽירְאוּ אוֹתוֹ כׇּל־אַפְסֵי־אָֽרֶץ׃